يالعيونك امان بليل كلـــــــه اشباح
وخدودك مزار لـــــــــــــــــــــــوردة القداح
من تمطر عيونك ورد يطلع كـــــون
ماردنه اعله خدك تطلع النــــــــــــه ارواح
عشنه اسنين ننطر والعيون تحوف
بعنه الحصه لجلك واشترينه اســـــــــــلاح
وصنكرنه اعله طولك والهلاهل خيل
غارت غاد منك مـــــــــــــن سمعنه اصياح
لجلك كاومينه الليل واهـــــل الليل
وخشـــــــم الليل شفته شلــــــون يمك طاح
صدر ديوان احنـــه وجنت بينه تلوذ
انذكـــــــــــــــرك مانريد ؟ نريد ننسه الراح
ماتنـــلاح ظنك .. شلت خشمك عود
عفة نفس بينـــه وكلــــــــــــــــــنه ماتنلاح
يالمنثور هرفي ..اعيوننه اتتانيــــك
مــن جفوف المناجــــــــــل تترس المسطاح
الفــــــلاح يرسم هاجسه ..ابمسحاه
وينشـــــد عالسنابل هاجس الفــــــــــــلاح
والمرواح خشبه وخشبه كلها اعيون
وانت اسرار تبقى بذمـــــــــــــــة المرواح
تبجي تريد نعطف لو بجيت اعليك
مانخفــض لذلك لـــــــــــــــو بجيت اجناح
تاخذ على المسرح دورنه بياجاه
والمذبـوح يعتق ركبـــــــــــــــــــــة الذباح
لاتظلم بخت تمساح عده احساس
ظل مـــــن الفشل لابس دموعــــه اوشاح
التمساح يبجي وعذره يحلم جان
واحد مـــن يشوفه يكــــــــــول موتمساح